آج چھڑی بدلی ہے اور 30 جنوری تک الیکشن کی گھڑی بھی بدلے گی:شیخ رشید

راولپنڈی: عوامی مسلم لیگ کے سربراہ شیخ رشید کا کہنا ہے کہ آج چھڑی بدلی ہے اور 30 جنوری تک الیکشن کی گھڑی بھی بدلے گی۔

ٹوئٹر پر جاری بیان میں شیخ رشید نے کہا کہ 4 ماہ سے پنجاب اسمبلی کا اجلاس جاری ہے، عدم اعتماد اورگورنرراج ممکن نہیں۔

انہوں نے کہا کہ اس حکومت میں آنے اور اسے لانے والے دونوں پشیمان ہیں،آج چھڑی بدلی، 30 جنوری تک الیکشن کی گھڑی بھی بدلے گی۔

سابق وزیر داخلہ نے مولانا فضل الرحمان کے بیان پر تبصرہ کرتے ہوئے لکھا کہ فضل الرحمان کے بیان نے ان کو رسوا کر دیا، عمران خان نے تنہا 13 پارٹیوں کی سیاست دفن کردی، اسمبلیاں تحلیل ہوگئیں توایک سال میں2 الیکشن کےنہ پیسے ہیں نہ منصوبہ بندی،گوٹی پھنس گئی ہے جب کہ 77 وزرا خزانے پر بوجھ ہیں۔

شیخ رشید کا کہنا تھاکہ معیشت ہی قومی سلامتی ہے جس پر کوئی خاموش تماشائی نہیں رہ سکتا، 8 مہینے سے فاقہ کشی، مہنگائی اور اب آئی ایم ایف کا جواب ہے، جو لندن دوائی لینے گئے تھے، وہ اب نیو ائیر کی چھٹیاں منا رہے ہیں، الٹی گنتی شروع ہو گئی ہے، جی کا جانا ٹھہر گیا۔