پاکستان ویمنز فٹبال ٹیم کے دورہ سعودی عرب کا شیڈول جاری کردیا گیا

پاکستان ویمنز فٹبال ٹیم کے دورہ سعودی عرب کا شیڈول جاری کردیا گیا،گرین شرٹس 11سے 19جنوری تک 4 ملکی ٹورنامنٹ میں شریک ہوں گی۔

دیگر 3ٹیموں میں میزبان سعودی عرب، ماریشس اور مشرقی افریقی ملک کموروس شامل ہیں۔ اس حوالے سے قومی ٹیم کے تربیتی کیمپ کا اعلان جلد کیا جائے گا۔

یاد رہے کہ پاکستان فٹبال ہاؤس کا چارج فیفا کی نامزد نارملائزیشن کمیٹی کو سپرد کیے جانے کے بعد پاکستان ویمنز ٹیم کی یہ دوسری بین الاقوامی مصروفیت ہوگی۔

اس سے قبل گرین شرٹس نے 8 سالہ تعطل کے بعد ساف چیمپئن شپ میں شرکت کی تھی، نیپال میں ہونے والے اس ایونٹ میں پاکستان ٹیم نے مالدیپ کو 0-7 سے شکست دے کر روشن مستقبل کی نوید سنائی تھی۔

پاکستان کی فیفا ویمنز رینکنگ میں بھی واپسی ہوچکی ہے اور اس وقت ٹیم 160ویں نمبر پر ہے۔